يا زول بحر

 

 

يا زول بحر

لليله تبكيك الحروف
لليله نبكيك بي غناك
يا زول بحــر
مسكون محنه وإندهاش
قالدنا موجو نفر نفر
لوونا بي ريدو الغباش
نستنى جيتو مع المطر
كل ما يبشربو الدعاش
كل ما الورود نِست الحذر
مالت علي كتف الفراش
كل ما مصابيح القصيد
خفتت ضياها بقت طشاش
معقوله هسه خلاص مشيت
والناس خلاص رفعوا الفُراش ..!!؟
يا وجعه جاوبي علي سريـــــــع
كيفن يموت زولاً وطن
يا وجعه اكبر من حروف
لبستي محبوبنا الكفن
معقوله صاح هادا الكلام
يا ناس هو محمــود إندفن ..!!!؟
مين تاني ببقالنا السكن؟
مين البسد جوع الصغار
مين البندحربّو الفتن ؟
لو مات صحيح
ورونا ليه عايشين إذاً ؟
محمود اقيف اسمع نداي
يازول ولا بنهيهو موت
رفرف جناحك يا غناي
وأدي القماري النايحه صوت
زِحّ الضلام البي وراك
كحل عوينات البيوت
معقوله زول زيك يموت ؟
او عادي بس يقدر يفوت !؟
مع إنو من حقك تفوت
ما إنت سويت العليك
والباقي في جيد الوراك
طولتّ قامات النخيل
طعمت موية النيل براك
ورفعت هامات الكرم
عليتا لي حد مستواك
يا ابويـا سويت العليك
مادام هو ربنا إصطفاك
شكراً بنقريك السلام
يلقاكا مبسوط في عُلاك
منجمي في جنة نعيم
دعواتنا توصل حد مداك

يا زول بحر

شعر / مناهل اسماعيل

الحوت | حواته يا محمود ما لينا اي حدود

 

 

عن al7oot

خريج كلية علوم التقانة قسم علوم حاسوب ومتخصص في تصميم المواقع وادارتها .. من عشاق الراحل الفنان الانسان " محمود عبد العزيز " وكما يحلو لعشاقه ان يسمونه " الحوت " ونسال الله له الرحمة وان يجعله من اصحاب اليمين ولاهله حسن العزاء ولنا الصبر الجميل.

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*